Десет илјади литри течен детергент, гелови за туширање, вино, цигари, авто-делови, играчки и илјадници други фалсификувани производи за домаќинството, вредни милион американски долари, биле отстранети од балканскиот пазар во серија интервенции на специјалните истражни тимови на Интерпол, во периодот на новогодишните празници…
– Операцијата „Бела жива“ се одвиваше на териториите на Македонија, Албанија, Србија, Босна, Хрватска, Црна Гора и на Бугарија и со неа беше идентификувана и растурена мрежа на илегална дистрибуција на фалсификувани стоки од заштитени марки, вредна милион долари. Во исто време беа уништени и фабриките за производство на лажните производи во Грција, Чешка, Албанија и во Бугарија – велат за “Нова Македонија”, во централата на Интерпол во Лион.
Според нивните податоци, во бугарскиот град Пловдив била уништена фабрика за производство на фалсификувани средства за чистење во домаќинствата на реномирани производители. На самото место биле запленети 10.000 литри течни детергенти и 60.000 парчиња фалсификувани пакувања и друг вид амбалажа.
Илегалната фабрика била дел од уште четири идентични погони за изработка на фалсификати што биле затворени пред три месеци во Грција, Чешка и во Бугарија.
Новина во илегалното производство е наоѓање и целосно уништување индустриска линија што полнела вино во амбалажа на познати вински марки. Лажната винарница се наоѓала во Албанија. Надлежните, во интерес на истрагата, сѐ уште не соопштуваат за кои фалсификувани вински марки станува збор.
Извор: Sky.mk
